الحلقة السادسة : تاك تيم

رقم الحلقه : الحلقة السادسة
اسم الحلقة : تاك تيم
بطل الحلقة : يوسف الحسيني
زمن الحلقة ٢٠١٢
.
في بداية الأمر احب اعرفكم بغزال غزاله الاول صاحبي وحبيبي وفردتي المخلصة وهو احسن راس حربه في مصر ودا طبعا من وجهة نظري التي لا قيمة لها على الإطلاق وان شاء الله هحكي عنه موقفين اثنين كنت انا شريك في احداثهما
الموقف الأول
وانا في أول سنه ليا في المعهد كنت معجب ببنت وقررت اني اكلمها لكنها كانت دايما في المحاضرات فدخلت الي المدرج للبحث عنها فوجدتها تجلس في وسط اصدقائها الفتيات ويوجد في البينج اللي وراها ولد فذهبت اليه وطلبت منه الجلوس بجواره وبدأت اغازلها ولكني تفاجئت انه هو أيضا كان يغازل صديقتها التي بجوارها وماهي الا دقائق قليله وبعدها سقطت الفتاتان في ايدينا واكتشفنا انهم صديقتان لا يفارقا بعضهما واتفقنا على الخروج سوياً وهو الأمر الذي جعلني مضطر للتعرف على هذا الولد الجالس بجواري فبدات انا بالكلام وسألته انت اسمك ايه و منين؟ فاجابني انه يوسف من مدينة الجماليه فقلت له يامحاسن الصدف احنا جيران انا من المنزلة من قريه اسمها مين خضير وبعدها قال لا انا مش من الجماليه انا من البصراط واعرفك وشوفتك قبل كده في مزرعة فلان الفلاني وفعلا انا كنت شغال هناك وبعد هذا التعارف خرجنا مع الفتاتان الي المكان الوحيد اللي كنت بقابل البنات فيه (حديقة الفرما) لدرجة ان أصحاب المحلات اللي حوالين الحديقة كانوا عارفيني 😂😂 وبعد أن بدأنا نحن الأربعة في التعارف على بعضنا اكثر فأكثر واذا بالبنت بتاعتي بتقترح اقتراح هو اننا نلعب اي حاجه وبعدها بدأنا نلعب (x&o) وبعد دقائق قليله واذا بالفتاه الثانيه تقول (هو احنا جاين عشان نلعب) 😂 فسالتها ضاحكا اومال احنا جاين نعمل ايه فضحكت هي الأخرى وبعدها أنهينا اللقاء وبعد انا علمنا انهم من سكان بورفؤاد قررنا نمشي معاهم لحد المعدية وبعدها أصبح يوسف احد احب الناس الي قلبي.
الموقف التاني
في الصف الثاني من المعهد كانت لدي صديقة نخرج كل يوم معاً ولكننا كنا نذهب إلى نفس الحديقة واذا بها في يوم من الايام تخبرني ان صديقتها تريد الخروج معنا فقلت لها (هتيجي معانا تنيل ايه) فقالت لي هات اي حد من اصحابك يقعد معاها وبعد تفكير طويل تذكرت ان هذه الفتاه كانت صارحتني انها معجبه بيوسف فلم أجد افضل منه ليأتي معنا وبعد أن اتصلت عليه واقنعته ان يأتي معي اتفقت معه اننا سنذهب للحديقة ولكن لن نجلس في مكان واحد وبعد أن وصلنا إلى الحديقة ودخلنا من الباب (أيامها الحديقة كان ليها باب دلوقتي مفتوحه على الشارع) فذهب هو الي اليمين وانا ذهبت إلى اليسار وما ان بدأت في الحديث مع صديقتي واذا بالاخري تأتي الينا مسرعة مخطوفة اللون وتقول بصوت مرتفع انا عاوزه اروح سألتها ليه قالت من غير سبب انا عاوزه اروح قولتلها خلاص براحتك اذهبي فقالت انا مش همشي غير وصاحبتي معايا فقولت لها وانا غارقا في الضحك (طيب وشامبو زنبه ايه بصوت طلعت زكريا في فيلم ابو العربي) وهي مصممة على أنها ستذهب وستاخذ صديقتها معها فقولت لصديقتي خديها وروحي المعهد وافهمي منها فيه ايه وانا هروح اسأل يوسف ايه اللي حصل وبعد أن ذهبوا بدأت اتحدث مع يوسف وهو يقولي معملتلهاش حاجه فسالته طيب قولتلها حاجه تضايقها او عملت حاجه تضايقها وهو يرد بجملة واحده والله ما عملتها حاجه وقولتله ياخبر دلوقتي بفلوس بكره يبقى ببلاش دلوقتي هنروح المعهد ونعرف كل حاجه وطول ما احنا ماشين في الطريق وانا متضايق منه لانه بوظلي الخروجه وعمال اسأله قول الحقيقه وهو مفيش غير نفس الجملة وبعد أن وصلت إلى المعهد بحثت عن صديقتي ولم أجد لها أثر في المعهد فجلست انا ويوسف داخل المعهد بالقرب من البوابة وفي مواجهة شارع كلية التربية الذي يأتي منه الطلاب الي المعهد واذا بي اري صديقتي في أول الشارع متجهة ناحية المعهد وهي غارقة في الضحك وكأن فيه واحد ماسك مفك وبيزغزها وكل ما تبص علينا تضحك وتداري وشها الي ان وصلت إلينا فسالتها عن السبب الذي جعل صديقتها تذهب وقالت لي بالحرف (البنت بتقولي يعني يوم ما تخرجوني تخرجوني مع واحد مؤدب) 😂 فنظرت الي يوسف وقلت له فضحتنا يا عره 😂😂
.
فترة المراهقة بتبقى أصعب فتره يمر بيها الإنسان ويحتاج فيها لإنشاء الصداقات وخاصة مع الجنس الأخر الي ان تنتهي فترة المراهقة ستكتشف بعدها انها كانت مجرد تفاهات لم تنفعك تلك الصداقات باي شئ في حياتك 😪
.
ادعمونا لكي نستمر